.jpeg)
தெனியாய பாடசாலை மாணவர்களிடையே வேகமாகப் பரவி வரும் காய்ச்சல் காரணமாக தற்காலிகமாக மூடப்பட்டிருந்த நான்கு முக்கியப் பாடசாலைகளை மேலும் மூடுவதற்கு அதிகாரிகள் நடவடிக்கை எடுத்துள்ளனர்.
சுகாதார அதிகாரிகளால் வழங்கப்பட்ட பரிந்துரைகளை கருத்தில் கொண்டு, நோய் பரவுவதைக் கட்டுப்படுத்தும் அவசர முன்னெச்சரிக்கை நடவடிக்கையாக இந்த முடிவு எடுக்கப்பட்டதாக தெனியாய வலய கல்விப் பணிப்பாளர் நிஷாக ஹெட்டிகொட தெரிவித்துள்ளார்.
அதற்கமைய, தெனியாய மத்திய கல்லூரி, தெனியாய ராஜபக்ச மகா வித்தியாலயம், தெனியாய புனித மத்தேயு இரு மொழிக் கல்லூரி மற்றும் பல்லேகம சித்தார்த்த வித்தியாலயம் ஆகியவை இன்று மற்றும் நாளை மூடப்பட்டிருக்கும்.
இந்த நான்கு பாடசாலைகளும் 7 மற்றும் 8 ஆம் திகதிகளிலும் நோய் காரணமாக தற்காலிகமாக மூடப்பட்டிருந்தன. எனினும், அப்பகுதியில் மாணவர்களிடையே நோய் பரவும் போக்கைக் கருத்தில் கொண்டு, தென் மாகாண கல்விச் செயலாளர், சுகாதாரத் துறைகளின் ஆலோசனையின் பேரில், விடுமுறைக் காலத்தை மேலும் நீட்டிக்க நடவடிக்கை எடுக்கப்பட்டுள்ளது.
மேலும், அப்பகுதி சுகாதார மருத்துவ அதிகாரி அலுவலகமும் கல்வி அதிகாரிகளும் நிலைமையைக் கட்டுப்படுத்த கூட்டு நடவடிக்கைகளை மேற்கொண்டு வருகின்றனர்.
அதிக காய்ச்சல், கடுமையான தலைவலி அல்லது வாந்தி போன்ற அறிகுறிகள் தென்பட்டால், தங்கள் பிள்ளைகளை எவ்வித தாமதமுமின்றி உடனடி மருத்துவ சிகிச்சைக்கு அனுப்புமாறு பெற்றோர்களுக்கு சிறப்பு அறிவுறுத்தல்களும் வழங்கப்பட்டுள்ளன.