கரியன் கேட் அருகே தனிமையில் இருந்த இளம் பெண் அஸ்வினி, நகை கொள்ளையடிக்க வந்த கொடூரர்களால் இரும்பு ராட்டால் அடிக்கப்பட்டு நான்கு நாட்கள் தீவிர சிகிச்சை பெற்றபின் இன்று பரிதாபமாக உயிரிழந்தார்.
கொலை வழக்காக மாறிய சம்பவத்தில், போலீசார் ஒரு குற்றவாளியை கைது செய்துள்ளனர். மீதமுள்ள துணை குற்றவாளியை தீவிரமாக தேடி வருகின்றனர். உறவினர்கள் மற்றும் கிராம மக்கள் காவல் நிலையத்தை முற்றுகையிட்டு போராட்டம் நடத்தியது போலீசார் மீது ஆத்திரத்தை தீவிரப்படுத்தியுள்ளது.
காஞ்சிபுரம் தாலுக்கா, திம்ம சமுத்திரம் ஊராட்சியின் கரியன் கேட் அருகே உள்ள காந்திநகரைச் சேர்ந்த 30 வயது அஸ்வினி, செங்கல்பட்டில் விடுதி காப்பாளராக பணியாற்றும் ஜெய் சுரேஷின் மனைவி. இந்தத் தம்பதியினருக்கு 11 வயது மகள் மற்றும் 2 வயது மகன் உள்ளனர். கணவர் வேலைக்காக வெளியூரில் இருப்பதால், பாதுகாப்பு கருதி அஸ்வினி தனது இரு குழந்தைகளுடன் தாய்வீட்டில் வசித்து வந்தார். இருப்பினும், கடந்த 24ஆம் தேதி உறவினர் வீட்டு சுப நிகழ்ச்சிக்கு சென்ற அஸ்வினி, இரவு தனது வீட்டில் தங்கி, காலை தாய்வீட்டுக்கு வருவதாகக் கூறினார்.மறுநாள் நண்பகல் வரை அஸ்வினி திரும்பாததும், செல்போன் ஸ்விட்ச் ஆஃப் ஆகியிருந்ததும் தெரிந்ததும், உறவினர்கள் விரைந்து வந்து பார்த்தனர்.
அப்போதுதான் வீட்டின் பூட்டு உடைக்கப்பட்ட நிலையில் கதவு திறந்து கிடக்க, உள்ளே ஆடைகள் கலைந்து, உடலில் இரத்தக்காயங்களுடன் அஸ்வினி அலங்கோலமாக கிடந்தார் .
உயிர் மட்டும் ஒட்டிக் கொண்டிருந்த நிலையில், உறவினர்கள் அவரை உடனடியாக செங்கல்பட்டு அரசு மருத்துவமனைக்கு அனுப்பினர். அங்கு நான்கு நாட்களாக தீவிர சிகிச்சை பெற்று வந்த அஸ்வினி, இன்று காலை சிகிச்சை பலனின்றி இறந்தார்.
பொன்னேரிக்கரை காவல் நிலைய போலீஸார், சம்பவ இடத்திற்கு விரைந்து வந்து, தடயவியல் நிபுணர்கள் மற்றும் மோப்பநாய் உதவியுடன் விசாரணை நடத்தினர். வீட்டில் சிதறிய பூட்டு, தரையில் உரைந்த இரத்தக்கறைகள் என அனைத்தும் கொடூர கொள்ளைக்கான சான்றுகளாக அமைந்தன.
அஸ்வினியின் மரணத்துடன் வழக்கு கொலை வழக்காக மாற்றப்பட்டது. "நகை-பணத்திற்காகவா? அல்லது பாலியல் வக்கிரமா?" என்ற சந்தேகங்களுடன் போலீசார் மரும நபர்களை தேடினர்.
இதற்கிடையே, உடலை வாங்க மாட்டோம் என உறவினர்களும் கிராம மக்களும் பொன்னேரிக்கரை காவல் நிலையத்தை முற்றுகையிட்டு திடீர் போராட்டத்தில் ஈடுபட்டனர். இந்த போராட்டத்தின் அழுத்தத்தால், போலீசார் தீவிர தேடுதல் வேட்டையில் இளம் குற்றவாளியை கைது செய்தனர்.
காஞ்சிபுரம் பாலுசட்டி சத்திரம், என்எஸ்.கே. நகரைச் சேர்ந்த 28 வயது தமிழ்வாணன் என்பவரை போலீசார் கைது செய்துள்ளனர். விசாரணையில், தமிழ்வாணன் தனிமையில் இருக்கும் வீடுகளை குறிவைத்து பூட்டை உடைத்து திருடுவதை வாடிக்கையாகக் கொண்டிருப்பதாகத் தெரியவந்தது. சம்பவத்தன்று இரவு, அவரது நண்பனுடன் (இன்னும் தலைமறைவு) அஸ்வினியின் வீட்டிற்குள் புகுந்தனர். நகை-பணத்தைத் தேடி வீட்டை சூரையாடிக் கொண்டிருந்தபோது, திடீரென அஸ்வினி வந்தார்.உள்ளே இரு திருடர்களைப் பார்த்து அலறி ஓடின அஸ்வினியை, தமிழ்வாணன் இரும்பு ராட்டால் சரமாரியாக அடித்து மடக்கினார்.
மயங்கி விழுந்த அவரை வீட்டிற்குள் இழுத்து சென்று, ஆடைகளை கலைத்து நகைகளை கொள்ளை அடித்து தப்பினதாக முதற்கட்ட விசாரணையில் வெளிப்பட்டுள்ளது. "சத்தம் வெளியே கேட்டால் மாட்டிப்போவோம்" என்பதே அவர்களின் கொடூர திட்டமாக இருந்தது
அஸ்வினியின் கணவர் ஜெய் சுரேஷ், "மார்பில் அடித்துக்கொண்டு அழுத இளைஞரின் கதறல் அன்று காவல் நிலையத்தையே கதற வைத்தது. தனிமையில் இருந்த அஸ்வினியை அந்தக் கும்பல் அழித்துவிட்டனர். யாராலும் தாங்க முடியாத வலி இது" என கண்ணீர் கலந்த குரலில் கூறினார். கிராம மக்கள், "இந்தப் பகுதியில் மது அருந்தி வரும் கூட்டம், தனி வீடுகள் என அச்சம் நிறைந்தது. போலீசார் இனி பாதுகாப்பு ஏற்படுத்த வேண்டும்" என வலியுறுத்தினர். போலீசார், தலைமறைவான தமிழ்வாணனின் நண்பனை வலைவீசி தேடி வருகின்றனர். நகைக்காக அப்பாவி தாய்மார்பளின் உயிர் பறிக்கப்பட்ட இந்தச் சம்பவம், காஞ்சிபுரம் பகுதியில் பெரும் பரபரப்பை ஏற்படுத்தியுள்ளது. உறவினர்கள் அஸ்வினியின் உடலை வாங்கி, கிராமத்தில் நடக்கவுள்ள இறுதிச் சடங்குகளுக்குத் தயாராகின்றனர்.