கிருஷ்ணகிரி மாவட்டம் சின்னமுத்தூரைச் சேர்ந்த முன்னாள் ராணுவ வீரர் சந்தோஷ் குமார் (37) மற்றும் தனியார் பள்ளி ஆசிரியர் மோனிஷா (28) தம்பதியரின் குடும்பப் பிரச்சினை சமூக ஊடகங்களில் பெரும் பரபரப்பை ஏற்படுத்தியுள்ளது. வரதட்சணை தொல்லை என்று தொடங்கிய குற்றச்சாட்டு, பின்னர் முற்றிலும் வேறு திசையில் திரும்பியுள்ளது.
சுமார் பத்து ஆண்டுகளுக்கு முன் சக்கரவர்த்தி–ஜெயந்தி தம்பதியரின் மகன் சந்தோஷ் குமாருக்கும் மோனிஷாவுக்கும் திருமணம் நடந்தது. இவர்களுக்கு ஒரு மகனும் ஒரு மகளும் உள்ளனர். சந்தோஷ் குமார் ராணுவத்தில் பணியாற்றி ஓய்வு பெற்றவர். மோனிஷா தற்போது கிருஷ்ணகிரியில் உள்ள ஒரு தனியார் மேட்ரிக் பள்ளியில் தற்காலிக ஆசிரியராகப் பணியாற்றி வருகிறார்.
சில நாட்களுக்கு முன் மோனிஷா அழுதுகொண்டே பேசிய வீடியோ சமூக ஊடகங்களில் பரவியது. அதில் அவர், திருமணமான நாள் முதலே கணவர் தினமும் வரதட்சணை கேட்டு தொல்லைப்படுத்துவதாகவும், புதிய வீடு கட்டப் பணம் வேண்டும் என்று சொல்லி அம்மா வீட்டுக்கு அனுப்பி வைத்ததாகவும், ஏடிஎம் அட்டை, கழுத்தில் அணிந்திருந்த சங்கிலி, மொபைல் போன் ஆகியவற்றைப் பறித்துச் சென்றதாகவும் கூறியிருந்தார். இதையடுத்து செய்தியாளர்கள் அவரைச் சந்தித்தபோது, கணவர் மீது காவல் நிலையத்தில் புகார் அளித்துவிட்டதாகவும் தெரிவித்தார்.
ஆனால் அடுத்த கட்ட விசாரணையில் நிலைமை மாறியது. மோனிஷா காவல் நிலையத்தில் புகார் அளிக்கவில்லை. மாறாக சந்தோஷ் குமார்தான் மனைவி மீது கிருஷ்ணகிரி அனைத்து மகளிர் காவல் நிலையத்தில் புகார் அளித்திருந்தார்.
அந்தப் புகாரில் குடும்ப மானத்தைக் காக்கும் நோக்கில் மனைவியின் வெளித் தொடர்புகள் குறித்து எதையும் குறிப்பிடாமல், அவர் நீண்ட நேரம் மொபைலில் பேசிக்கொண்டிருப்பதாகவும், அவரை அழைத்துச் சென்று தன்னுடன் வாழ அனுப்ப வேண்டும் என்றும் மட்டும் குறிப்பிட்டிருந்தார்.
சந்தோஷ் குமார் தரப்பில் கூறப்படும் பின்னணி இதுதான். ராணுவத்தில் பணியாற்றிய காலத்தில் மனைவி மேற்படிப்பு படிக்க வேண்டும் என்ற ஆசையில் அவரை அம்மா வீட்டில் தங்க வைத்து ஊத்தங்கரையில் உள்ள தனியார் கல்லூரியில் சேர்த்து தன் சம்பளத்திலேயே படிக்க வைத்தார்.
அப்போது மோனிஷா பல ஆண்களுடன் நெருக்கமாகப் பழகத் தொடங்கியதாகவும், அடிக்கடி வெளியூர் செல்வது, மொபைலில் நீண்ட நேரம் பேசுவது போன்ற விஷயங்கள் அரசல்பரசலாக அவருக்குத் தெரிய வந்ததாகவும் கூறுகிறார். இதனால் வேலையை விட்டுவிட்டு சொந்த ஊருக்கு வந்து பால் பண்ணை தொழில் தொடங்கினார். பின்னர் மோனிஷாவும் படித்து முடித்து பள்ளியில் ஆசிரியராகச் சேர்ந்தார்.
சில நாட்களுக்கு முன் காலை 11 மணிக்கு சந்தோஷ் குமார் வீட்டுக்கு வந்தபோது முன் கதவை நீண்ட நேரம் தட்டியும் திறக்கவில்லை. பின்புறக் கதவு வழியாக உள்ளே செல்ல முயன்றபோது மோனிஷா அந்தக் கதவை இறுகப் பிடித்துக்கொண்டிருந்தார். அதே நேரத்தில் முன் வாயில் வழியாக ஒருவர் வெளியே ஓடிச் சென்றதை அவர் பார்த்தார். மோனிஷாவோ “வீட்டைச் சுத்தம் செய்யும்போது தவறி விழுந்து மயக்கம் வந்தது” என்று சொல்லி தட்டிக்கழித்தார்.
அருகில் இருந்த சிசிடிவி காட்சிகளைப் பார்த்தபோது, ஓடிச்சென்றவர் அப்பாசாமி நாயுடு தெருவைச் சேர்ந்த நவீன் என்பது தெரியவந்தது. மேலும் பழைய காட்சிகளைப் பார்த்தபோது, நவீன் காலை 11 மணிக்கு போலீஸ் ஸ்டிக்கர் ஒட்டிய புல்லட் வாகனத்தில் வந்து மரக்கட்டைகள் அருகே வாகனத்தை நிறுத்தி வீட்டுக்குள் சென்று மாலை 3 மணி வரை இருந்துவிட்டுச் சென்றதும் பதிவாகியிருந்தது.
சந்தோஷ் குமார் பால் பண்ணை வேலை காரணமாக காலையில் வெளியே சென்று மாலையில்தான் வீடு திரும்பும் வழக்கம் உள்ளதால், அந்த இடைப்பட்ட நேரங்களில் இதுபோன்ற வருகைகள் அடிக்கடி நடந்திருக்க வாய்ப்புள்ளதாக அவர் சந்தேகித்தார்.
இதையடுத்து ஏற்பட்ட வாக்குவாதத்திற்குப் பிறகு மோனிஷா கணவரின் சம்பள ஏடிஎம் அட்டை உள்ளிட்ட ஆவணங்களை எடுத்துக்கொண்டு தாயார் வீட்டுக்குச் சென்றுவிட்டார். சந்தோஷ் குமார் பலமுறை சமாதானம் பேசி அழைத்தும் அவர் திரும்பவில்லை. குழந்தைகளுக்காக மனைவியை ஏற்றுக்கொள்ளத் தயாராக இருந்ததாக அவர் கூறுகிறார். ஆனால் மோனிஷா மறுத்துவிட்டார்.
பின்னர் சந்தோஷ் குமார் தன் தாய் ஜெயந்தி, அண்ணன் சரவணகுமார் (ராணுவம்), தங்கை சத்தியவாணி, அஜித் உள்ளிட்டோருடன் மோனிஷா வீட்டுக்குச் சென்று தனது ஏடிஎம் அட்டை மற்றும் ராணுவ வீரருக்கான கேண்டீன் அட்டையை மீட்டு வந்தார். அப்போது மோனிஷாவின் மொபைலையும் எடுத்துச் சென்றார். வங்கி அறிக்கையில் சுமார் ரூ.70,000 வரை (9,000 ரூபாய் ரூபாயாகப் பலமுறை) எடுக்கப்பட்டிருப்பது தெரியவந்தது.
மொபைலைப் பரிசோதித்தபோது மேலும் ஒரு தகவல் வெளிப்பட்டது. மோனிஷா காவேரிப்பட்டினம் அப்பாசாமி தெருவைச் சேர்ந்த விஜய் என்பவருடனும் பழகியிருந்தார். விஜய் சமீபத்தில் (சுமார் 10 நாட்களுக்கு முன்) திருமணம் செய்துகொண்டவர். விஜய்யின் பெரியப்பா மகன்தான் நவீன். அதாவது அண்ணன்–தம்பி இருவரிடமும் மோனிஷா தொடர்பு வைத்திருந்ததாக சந்தோஷ் குமார் தரப்பில் கூறப்படுகிறது.
விஜய்யிடம் விசாரித்தபோது, 2025 டிசம்பர் முதல் இன்ஸ்டாகிராம் மூலம் பழக்கம் ஏற்பட்டதாகவும், பின்னர் நவீன் தன் இன்ஸ்டா ஐடியில் இருந்து மோனிஷாவுக்கு செய்தி அனுப்பத் தொடங்கிய பிறகு தன்னை மோனிஷா தடை செய்துவிட்டு நவீனுடன் தொடர்ந்து பழகியதாகவும் அவர் தெரிவித்ததாகச் சொல்லப்படுகிறது. மொபைலில் பலருக்கு செய்தி அனுப்பி, பேசி, பின்னர் நீக்கியதற்கான ஆதாரங்களையும் சந்தோஷ் குமார் திரைக்காட்சிகளாக எடுத்து வைத்திருப்பதாகத் தெரிகிறது.
சந்தோஷ் குமார் மனைவியிடம் பேசிய ஆடியோவும் வைரலாகியுள்ளது. அதில் அவர் ஆதாரங்கள் இருப்பதாகச் சொல்லி, இருந்தாலும் குழந்தைகளுக்காக ஒன்றாக வாழத் தயாராக இருப்பதாகக் கேட்டபோது, மோனிஷா “எல்லாருடனும் நட்பாகத்தான் பழகினேன், தவறான தொடர்பு இல்லை” என்று சத்தியம் செய்துவிட்டு, இனி ஒன்றாக வாழ விருப்பமில்லை என்று பதிலளித்ததாக அந்த ஆடியோவில் இடம்பெற்றுள்ளது.
மோனிஷாவின் சகோதரி, தங்கை நவீனுடன் பைக்கில் பல இடங்களுக்குச் செல்வதைப் பார்த்து கண்டித்துள்ளார். தாய் வீட்டாரும் பலமுறை எச்சரித்தும் கேட்கவில்லை என்று கூறியுள்ளனர்.
தற்போது இந்த விவகாரம் குறித்து காவல் துறை விசாரணை நடத்தி வருகிறது. வரதட்சணை தொல்லை என்று முன்வைக்கப்பட்ட குற்றச்சாட்டுக்குப் பின்னால் குடும்ப உறவு முறிவு மற்றும் வெளித் தொடர்புகள் தொடர்பான முரண்பட்ட தகவல்கள் வெளியாகி உள்ள நிலையில், இரு தரப்பு வாதங்களையும் ஆய்வு செய்து உண்மை நிலவரத்தைக் கண்டறிய வேண்டியது காவல் துறையின் பொறுப்பாக உள்ளது.